A YEAR OF FAITH FEATURE FOR NOVEMBER 2012
BY FR. RAMIL MARCOS
Noong Ikalawang Konsilyo Vaticano
o Vatican II, ang pandaigdigang pagtitipon ng mga Obispong Katoliko mula
1962-1965, nasulat ang dokumentong Lumen Gentium (salin sa Ingles: Light of the
Nations; at official title sa Ingles: Dogmatic Constitution on the Church). Ang mahalagang dokumentong ito ay naglalaman
ng aral ng ating Simbahan tungkol sa ating pang-unawa tungkol sa tunay na anyo
at kilos ng Simbahan. Ito ang unang
pagkakataon na nagnilay at naglahad ng kanyang turo tungkol sa kanyang sarili
ang Simbahan.
Bagamat marami nang nasulat
tungkol sa Simbahan noon pa man, subalit ang Lumen Gentium ang unang pagninilay
na nag-ugnay sa SImbahan sa Banal na Kasulatan, sa aral ng mga Fathers of the Church at sa makabagong
hamon ng daigdig. Dati kasi ang Simbahan
ay pinag-uusapan lamang kaugnay ng mga batas na may kinalaman sa pagpapatakbo
ng kanyang buhay. Ngayon, talagang
naka-ugat sa Tradisyon ng Simbahan ang mga pagninilay na inihandog ng Vatican
II.
Ano ba ang Simbahan ayon sa ating
pananampalataya?
Una, ang Simbahan ay
Misteryo. Kalimitan kapag sinabing
misteryo, ang akala natin ay mga bagay na hindi nauunawaan, mga bagay na tago
at lingid sa ating kaalaman. Subalit ang
misteryo ay halaw sa salitang griyego na misterion at salitang latin na
sacramentum. Ang mga salitang ito ay
kapwa may kahulugan na naka-ugat sa mga turo ni San Pablo sa Bibliya. Kay San Pablo, ang misteryo ay isang bagay na
inilahad ng DIyos, ibinunyag ng DIyos para sa ating kaligtasan. Hindi nakatago, kundi nakalahad para sa
pagliliwanag ng isip at puso ng lahat.
Ang Simbahan pala ay isang
kasangkapan ng Diyos sa pagsisiwalat Niya ng Kanyang pagmamahal at paglingap sa
buong sangkatauhan.
Ikalawa, ang Simbahan ay Bayan ng
Diyos. Bago ang Vatican II, maraming tao
ang nag-iisip na pag simbahan, dapat gusali.
Malalaking gusali para sa pagsamba.
Malalaking gusali para sa ritwal ng pananampalataya. Subalit sa Lumen Gentium, unti-unti natutunan
ng mga Katoliko na ang Simbahan ay sila, tayo, magkakasama bilang mga anak ng
DIyos. Tayo ang simbahan dahil tayo ang
Bayan ng DIyos.
Sa bibliya, ang unang Bayan ng
Diyos ay ang Israel subalit itinutuloy ng Simbahan ang pagtawag sa Israel sa
ating panahon ngayon.
Dahil Bayan ng Diyos, tayo ay
naglalakbay, kumikilos, lumalakad sa kasaysayan. Hindi pa tapos an gating misyon. Magkakasama tayong tumutugon sa panawagan ng
DIyos sa atin.
Ang Simbahan ay misteryo at
bayan. Pagnilayan natin kung akma ba
dito ang ating pananaw sa ating minamahal na SImbahang Katolika.
LOG: YEAR OF FAITH UPDATE
Comments